萬千星輝頒獎典禮 (2022)

ching2506

(Topick!)
【萬千星輝頒獎典禮】陳山聰由視帝大熱跌入男配？　姚子羚降呢跟After Class爭女配獎
2022/11/21 (17:30)

TVB年度盛事《萬千星輝頒獎典禮2022》將於明年1月8日（星期日）舉行，今日（11月21日）公佈了各個獎項的提名名單，並如上年一樣大幅增加入圍名額，其中16個獎項將由全港觀眾、TVB全台職藝員及TVB評委會投票選出，包括最佳男主角、最佳女主角、最佳劇集、最受歡迎電視男角色、最受歡迎電視女角色、最佳男配角、最佳女配角、飛躍進步男藝員、飛躍進步女藝員等，投票時間由11月21日至12月30日深夜12時止。

陳山聰「降呢」最佳男配角？
不過提名名單公開後引起網民紛議，皆因主角與配角之分別引起不少疑問，例如今年有6套劇集孭飛為男主角的陳山聰，在《鐵拳英雄》、《十八年後的終極告白2.0》、《超能使者》亦可謂第二男主角，惟「降呢」提名至「最佳男配角」組別，只剩餘下三劇提名男主角，分別是《金宵大廈2》、《回歸光影頌: 我的驕傲》、《美麗戰場》。

但在其他劇集的第二男主角如《痞子殿下》朱敏瀚、《美麗戰場》方力申、《法證先鋒V》洪永城亦同樣入圍「最佳男主角」組別，而《白色強人II》三大男主角皆入圍視帝提名，情況不一，令人疑惑。

姚子羚與After Class爭女配
在女主角的提名名單同樣出現類似情況，姚子羚今年唯一一部劇集《鐵拳英雄》的入圍，亦被降呢至「最佳女配角」，更要憑《青春本我》的炎明熹﹑姚焯菲﹑鍾柔美、和詹天文等爭獎，真的令人摸不着頭腦。

《青春本我》獲得最多提名
另外，獲得最多提名的劇集並非4大台慶劇之一，而是由《聲夢傳奇》學員主演的《青春本我》單是在主角、最喜愛男女角色、配角獎項組別已合共有26個提名，冠絕其他劇集，認真厲害。

ching2506

(on.cc)
視帝大熱林敏驄冇去台慶記者會　唐詩詠已離巢望劇集攞獎
11月21日(一) 18:01

無綫台慶頒獎禮今日公布各獎項的入圍名單，當中，視帝、視后最多提名的陳展鵬及唐詩詠均沒有出席記者會，詩詠已經離巢無綫，而展鵬則指有工作在身而未能出席，不過，據知「視帝」大熱之一的林敏驄就未被無綫邀請出席，今日記者會出席者不多，林敏驄接受東網訪問時被問到會否覺得不被重視時，他反問:「乜我要出席㗎咩? (你係視帝大熱喎!) 唔清楚、唔知道、冇研究、冇所謂！講完！」

至於展鵬乃今年視帝獲提名最多的一位，一共有4項提名，對此，他坦言開心，亦感激公司給自己機會，問到有否信心再奪視帝時，他謂:「其實做演員最緊要係有多啲唔同嘅角色嘗試，呢個先係最重要，我都好開心，之前喺唔同劇集入面演嘅角色都好唔同，觀眾睇到覺得有新鮮感同鍾意先係最重要，獎項隨緣啦！」而唐詩詠則表示:「好開心之前拍嘅劇今年都出晒，而且4套劇都係好唔同類型，希望呢啲劇集嘅台前幕後工作人員都攞到獎啦！」

ching2506

(明報)
台慶頒獎禮2022｜馬國明為女友湯洛雯拉票 譚俊彥撐陳山聰贏視帝
2022年11月21日 (18:29)

《萬千星輝頒獎典禮2022》明年1月8日在電視城舉行，無綫今日公布各獎項的入圍名單，譚俊彥、馬國明、陳自瑤、丁子朗、宋宛穎、梁凱晴及邵初等50名候選藝員現身記者會拉票。

總經理曾志偉頒發由藝員投票選出的「我至Like《傳承·狂歡55》綜藝節目」，最後由《黃金盛宴》、《全城一叮》及《香港小姐再競選》奪得。馬國明負責揭曉「最受歡迎電視女角色」提名名單，他看見女友湯洛雯榜上有名時直言：「當然睇好湯洛雯，當然有私心啦！」負責揭曉「最佳女主角」入圍名單的譚俊彥則力撐他主演的《十八年後的終極告白2.0》女主角龔嘉欣。

上屆視帝譚俊彥今年憑《廉政行動2022》及《十八年後的終極告白2.0》獲得兩個視帝提名，他自言平常心面對，見到《十八年2.0》及劇中多位演員被提名已覺得是大滿貫。譚俊彥說︰「我私心撐陳山聰，希望大家努力得到回報。我去年得獎也要多謝馬國明，因他不斷鼓勵我，今年就輕鬆很多。」馬國明聞言取笑譚俊彥︰「你去年很輕鬆呀，因為你一定攞。」

馬國明同樣平常心爭獎，他支持《白色強人II》兩位拍檔陳豪、郭晉安，也希望《白》劇可擸盡所有獎項、女友湯洛雯又可奪得「最受歡迎電視女角色」獎。他說︰「我會幫她拉票，希望大家投湯洛雯一票，將我的一票也投給她﹗」被問到是否身家也全給湯洛雯時，馬國明說︰「這個不要公開講，問譚俊彥就會知，哈哈﹗」譚俊彥自言身上只得一張八達通，所有錢由太太管理。湯洛雯除了「電視女角色」外，也有份角逐視后。馬國明被問到如女友奪視后是否立即結婚慶祝時，笑言「唔關事」。

ching2506

(on.cc)
張寶兒力撐袁偉豪脾氣好蔣家旻有信心入「最佳女配」5強
11月22日(二) 19:04

藝人張寶兒、蔣家旻（Angel）和「旅遊達人」項明生今日（22日）現身電視城，為全新旅遊節目《45日環遊日本》宣傳，整個日本行程共花費約30萬港元。姜麗文因事未能出席，但有拍片隔空支持。現場寶兒和Angel玩執喼，及寫下3人心願，寶兒希望驅走疫情，Angel就好希望拍第二輯。

蔣家旻憑《美麗戰場》角逐「最佳女配」，至於劉佩玥和朱晨麗就角逐視後，似造就Angel 成為女配大熱，她笑言女配有38人，競爭都相當激烈，又說：「可能每個人定義唔同，人哋會覺得4個都係女主角，但我拍完都覺得自己係女配角，無乜嘢，個個觀點唔一樣，提名控制唔到，等公司決定。」她對入5強有信心，但對獎項就無特別諗，不抱太大期望，一切隨緣。問她是否覺得角逐女配較著數？她稱楊卓娜和趙希洛都很好，其實個個獎項競爭都好激烈，一切聽天由命。


(on.cc)
郭柏妍成「飛躍女」大熱自覺角色得人喜愛已當贏
11月22日(二) 20:02

藝人郭柏妍（Rosita）、邵珮詩、何泳芍和廖慧儀等今日（22日）為《歡樂滿東華》排練滑板項目，Rosita於《下流上車族》學過滑板，但因滑板款式不同，故要重新學過，由於練習時間不多，故會加緊練習。而練習期間有跌親膝蓋舊患，感覺還好，而且本身是東華的舊生，10年前有為學校做慈善表演，估不到10年後今日再為慈善出力，感到好開心。

提到她憑《下流上車族》角逐台慶3項提名，分別「最受歡迎電視女角色」「最佳女配角」及「飛躍進步女藝員」，她表示無想過有機會提名，自己演出時較緊張，感謝因為有鮑起靜、江美儀和林敏驄才令大家留意到她，也感謝幕後團隊的辛苦，及監製陪她一齊學踩板等。她覺得「車芊芊」角色得人喜愛已當贏，無特別想過奪獎，無論邊個獲獎也會感到開心。對被指是「飛躍」的大熱，她說：「會抱平常心，每個有份角逐嘅女仔都做得非常好，為劇付出好多，好鍾意多人完成一件事嘅精神。」

她表示會支持美儀姐、鮑姐和林敏驄角逐視帝和視後，笑言會撐家人，但問到江美儀和鮑起靜同爭視後，「媽媽」和「嫲嫲」撐邊個？她突然語塞，直言手心是肉手背亦是肉，希望能有雙視後出現。

ching2506

(on.cc)
龔嘉欣心臟血管出事　否認得罪高層被雪藏：公司好錫我！
11月22日(二) 14:25

無綫花旦龔嘉欣現身商場聖誕活動，剛與一班朋友飛日本一個月的她，到了東京及福岡，旅遊之餘順道了解當地食店新技術，雖然台慶前已回港，但因身體問題未能出席，她說：「因天生心臟血管問題，台慶需要好長時間，所以公司都好體諒（即係咩事?）血管位生歪咗，如果要做手術要開胸，屬於大手術，醫生都建議唔好做，呢排就做啲短時間嘅工作，之後都會拍新劇。（身體咁都拍到劇？）都OK，之前《新四十二章》都照拍打戲，但怕大家擔心先冇講。（病發時會點樣？）有時心口痛，要食藥減慢心跳。」

談到《新》劇兩度被抽起，嘉欣解釋因該劇與大陸同步播映，故需要重新配音及剪接才能播放，問到可有失望？她說：「以公司安排為大前提，只要對部劇好，做演員都會配合。」

而她憑《十八年後的終極告白2.0》及《回歸光影頌：究竟天有幾高》兩劇入圍角逐視后，問到可有信心？嘉欣表示：「一定要對自己有信心，但最開心係套劇令觀眾有共鳴，一齊陪笑陪喊，（對邊套比較有信心？）《十八年》，因為我同Shaun（譚俊彥）喺入邊都合作得好好，大家創造咗好多驚喜出嚟。佢又好唔錫身，比我任打都OK。」

對於有指今年提名名單惹爭議，嘉欣坦言沒有留意，連自己入圍亦是昨晚才獲悉：「好多朋友話投我票，先醒起要開始拉票（對頒獎禮持放棄態度？）唔係，我好積極，只係未發力，個名單尋日先出，依家拉票都未遲，要好好地諗吓點樣拉票。套劇播咗之後有回響已經很開心，如果有獎梗係錦上添花。」她更指要食定藥出席頒獎禮。談到有指因得罪高層被雪藏？嘉欣對此表示：「公司好錫我，嚟緊已經安排咗拍劇，係一個正能量嘅角色。」

ching2506

(星島/頭條)
梅小青睇好陳展鵬鮑起靜奪視帝視後
方俊下月為張偉文擺大壽送溫暖
22/11/2022 23:51:00
   
張偉文經理人方俊媽媽麗麗姐日前90大壽，前無線「金牌監製」梅小青、姚煒、張偉文、胡渭康、環星娛樂老闆張國林等出席賀壽，席間梅小青開金口跟方俊唱出《漫步人生路》；張偉文和方俊又合唱《每當變幻時》，姚煒及小青姐從旁打氣，曾患過新冠肺炎嘅張偉文十分精靈。

之前梅小青接受鄭丹瑞節目訪時，自爆曾患上初期膀胱癌，左腦有血管又塞咗95%！幸能及時作適切治療，故完成《法證先鋒IV》後退休。問到現時健康狀況？小青姐笑曬口形容係十分好，她好開心報平安：「我有Keep住去做檢查，醫生話我樣樣都好，健康仲好過佢喎！」至於會否重返拍劇？她表示有keep住義務寫劇本，又大讚最近TVB啲劇集好好睇，尤其喜歡鮑起靜啲戲。

以小青姐專業眼光，今年視帝、視後又誰屬呢？她坦言一向鍾意鮑姐：「我有睇《下流上車族》，佢嘅戲一直好感人，以往同佢合作過《法證先鋒IV》，佢啲戲超正，搞到我完全唔記得嗌Cut，好鍾意佢。至於心目中嘅視帝、視後有好多，但特別鍾愛係陳展鵬。展鵬喺《超能使者》中做得好好，而且個劇本畀機會佢表現，佢又捏拿得好好；鮑姐係視後就開心，(兩個係膽？)係我期望啫！」不過，最後小青姐都戴返個頭盔，強調得獎仲要配合其他因素嘅。

ching2506

(明報)
仁濟心｜袁偉豪缺席記者會 鮑姐睇好「新抱」江美儀膺視后 2022/11/23 (18:29)

無綫製作5集短劇《仁濟心》，由鮑起靜（鮑姐）、袁偉豪、蔣家旻、文雪兒及吳家樂等演出，將於周六（26日）首播，今天（23日）舉行記者會。

袁偉豪近日在社交網發文狂呻，指「不明為何報道永遠都係錯重點？明明係宣傳新歌，講吓近況，但係永遠出嚟就係錯重點嘅呢？」連處境劇《愛．回家之開心速遞》日前播出一集，劇情講歐瑞偉疑影射他炮轟傳媒所說「我欠咗你哋班傳媒？」被指有抽水之嫌。未知是否受負面報道影響，袁偉豪今天未有現身，無綫公關亦只交代他有事未能出席。

鮑姐憑劇集《下流上車族》在《萬千星輝頒獎典禮2022》角逐「最佳女主角」，她感開心和榮幸，謙稱全靠好劇本和拍檔，才使劇集受歡迎。鮑姐看好「新抱」江美儀爭視后，自己卻信心不大，她說：「老人家機會應該不大，出街人人都叫我『Emma婆婆』已當得獎。其實每部劇集都好好和平均，我都好喜歡林敏驄和陳展鵬，特別展鵬在《超能使者》揮灑自如，又多高難度動作，連唐詩詠的角色也做得好好。」

她指林敏驄和展鵬就像自己左右手，如果真的要投票心水，她直認多多少少也必定會偏心，必揀亞視之友。

ching2506

(晴報)
押注「亞視幫」揚威台慶頒獎禮 鮑起靜撑陳展鵬江美儀封帝后
發佈時間: 2022/11/24

鮑起靜（鮑姐）憑《下流上車族》力爭台慶頒獎禮最佳女主角，不過她昨日謙稱自己是老人家，得獎機會微，反而睇好江美儀封視后；鮑姐更自言是《超能使者》粉絲，坦承偏心陳展鵬多過《下》劇拍檔林敏驄，所以希望展鵬封帝，「我多多少少都偏心亞視幫！」

鮑起靜及蔣家旻等昨日出席劇集《仁濟心》記者會，原定到場的袁偉豪臨時以有事為由缺席，未知是否避免回應他批評傳媒報道錯重點，以及《愛‧回家之開心速遞》劇情疑向他抽水一事。

至於鮑姐昨日談及視后之爭時笑說：「好榮幸，不過我嘅信心畀晒江美儀，希望佢贏視后。」鮑姐早年已奪金像影后，若贏視后便稱霸影視圈，但她未戰先認輸︰「我覺得老人家機會唔大。（想跟林敏驄封帝后？）如果同佢一齊攞，大家會喺台上見到佢蝦我！」

讚《超能使者》唐詩詠出色
鮑姐又向《超能使者》大派高帽︰「陳展鵬今次有突破，我都鍾意睇《超》劇，佢同陳山聰、唐詩詠都揮灑自如，我覺得詩詠個角色Q姨好得喎。（《超》劇好大威脅？）係，不過唔使驚，全部都係我嘅仔女。（最佳男主角撑陳展鵬定林敏驄？）咁要左手同右手猜包剪揼。（偏心想亞視幫封帝后？）多多少少都有，我話無，你哋都唔信。」

ching2506

(on.cc)
唐詩詠視后叫四飛　自認唔係親生女難爭獎
11月25日(五) 16:01更新 15:01建立

藝人唐詩詠今日（25日）於大埔出席公開活動，她於今年台慶頒獎禮視后「叫四飛」，問她可有信心奪獎？詩詠笑言：「其實4套都唔同種類，好難揀，最想攞最佳劇集，但又有強勁對手《下流上車族》，我都好鍾意呢套劇。（會唔會覺得唔係TVB親生女贏面會冇咁高？）哦，都好明白，有就喜出望外啦。」詩詠指都想陳展鵬奪視帝，因對方於《超能使者》中精神病與康復者之間的情感互換，做得非常出色。

TVB台慶夜爆發染疫潮，詩詠指都有致電她的髮型師問候：「因為佢有去到，其實大家都好辛苦咁排練，免疫力低咗，當晚大家都表演得好好。」詩詠指日前曾見過有去台慶的張曦雯，之後亦會見黃翠如兩公婆，蕭正楠當晚有去台慶，但眾人都有做檢測沒事，而詩詠自己都有Keep住做快測，因始終家有老人家，安全最緊要。

ching2506

- SYOK手机应用程式28/11發放內容
- 提名名單大致跟香港一樣, 只是沒包括凶宅清潔師 (劇集, 男主角 - 洪永城, 鄭俊弘, 女主角 - 傅嘉莉)

TVB Jade Power Facebook:
【万千星辉颁奖典礼2022(马来西亚)】
一年一度嘅万千星辉颁奖典礼2022(马来西亚)又来了！
你最喜爱的TVB电视剧集係边齣啊 ？
投票日期由今日起至12月28日呀！！
大家快D扫瞄QR code或者去SYOK手机应用程式投票啦~

万千星辉颁奖典礼2022马来西亚｜投票日期11月28日至12月28日｜TVBJ马来西亚翡翠台
#TVB电视剧集
#最喜爱TVB男主角
#最喜爱TVB女主角