黎振燁朱智賢偷食事件

iamsunny

占

iamsunny

陪朱智賢睇醫生！黎振燁傳離婚　大肚妻孤單產檢

港男黎振燁背大肚妻偷嗒朱智賢，由世紀暖男變世紀賤男！黎太下月就生得，有指黎振燁與朱智賢搭上後，便向大肚妻提出離婚，黎振燁更被發現從黃大仙上邨搬行李回父母家，似是為離婚作準備。而黎太日前獨自到醫院覆檢，未見黎振燁身影，認真可憐！

搬完行李回家當日，黎振燁陪朱智賢去看醫生，之後兩人又去到山上密會地點調情一小時，最後黎振燁先載朱智賢回家，自己則回黃大仙上邨家中。

iamsunny

朱智賢喊住道歉　謝東閔打救：會陪住佢走過呢一關！

前港姐朱智賢背着男友謝東閔偷食人夫黎振燁，在車廂食蛋糕事件曝光後，朱智賢受盡千夫所指，曾哭求男友原諒，「被劈腿」的謝東閔終心軟，今日在無綫安排下，兩人在電視城開記者會作出交代。

二人一黑一白造型現身，先讓傳媒拍照，謝東閔說：「好擔心佢承唔承受到壓力，佢已經將成件事講咗我聽，我會陪住佢走過呢一關（女方低頭喊）。自己都有責任，掛住工作，疏忽咗佢，佢係一個好女仔，好勤力嘅人，希望大家畀個機會佢，畀佢反思吓，希望佢繼續喺TVB工作。」

被萬箭穿心，朱智賢即喊住講：「對唔住，令大家失望對唔住，我知自己做錯嘢，我對唔住錫我嘅人，對唔住畀機會我嘅人，背負咗公司，要向呢件事受傷害嘅人講對唔住。」朱智賢說話期間，謝東閔十指緊扣女友，為對方打氣。

而無綫高層樂易玲一直都有陪伴兩人，但沒有步入記者室內，當記招完畢，傳媒步出記者室欲上前訪問樂易玲，她沒有回應轉身離開。

iamsunny

朱智賢自爆偷食人夫原因：抽離唔到角色

近日被爆搭上人夫黎振燁的藝人朱智賢，今日與男友謝東閔在電視城開記招道歉後，兩人再接受無綫節目《東張西望》的訪問，朱智賢全程邊說邊流眼淚，她說：「我承認因為拍劇而導致依家咁樣，覺得自己經驗唔夠，演戲經驗唔多，唔夠專業搞成今時今日咁樣，我覺得自己抽離唔到個角色，好多謝Brian（謝東閔）喺呢段時間陪住我，因為我知道佢其實承受咗好多，比我更加難受更加痛苦。」

問有否覺得令到家人擔心？她說：「我最想同屋企人講對唔住，好唔想因為我自己嘅事影響到屋企人，我記得我即時Send短訊畀我爹哋，我好驚影響到佢，唔想屋企人畀人講閒話，我唔想因為我一個人嘅事影響到我身邊嘅人，同埋我好想同劇入面嘅演員講對唔住，仲有監製講對唔住，因為我嘅唔專業而連累到大家，我以後會做番好啲，希望大家畀個機會我。（會唔會好忟自己犯呢個錯失？）我真係好後悔、好內疚，我都接受唔到自己犯呢個錯。」

至於謝東閔就繼續力撐對方：「盡量唔使工作嘅時候會陪佢多啲，因為呢段日子都唔係咁易過，可能受到出面好多壓力，我希望呢段時間都可以陪佢一齊走過呢個階段。」

另外，謝東閔出席完記者會，在社交網上載一張史泰龍的相片，並引用電影洛奇電影系列的電影金句，表示：「it ain't about how hard you hit , its about how hard you can get hit and keep moving forward（它不是在於你受到多大的打擊，而是在於你受到多大的打擊而不斷前進）」

iamsunny

黎振燁拖大肚妻蒲頭　自爆霧水緣幾個禮拜玩完

有婦之夫黎振燁偷嗒拍檔朱智賢，形象插水一鋪清。黎振燁潛水4日，昨日（4月30日）終於蒲頭，與大肚老婆孖住出街，突然賤男變暖男！

早上10時許，他與老婆齊齊穿上黑色「情侶裝」，搭的士往父母寓所長沙灣海麗邨。黎振燁孭住大型行李袋，又拖又攬老婆，還幫太太掹衫，似乎夫妻關係暫時雨過天青。

黎太：念在有小朋友
「受害人」黎太面對記者顯得頗為緊張，問到是否原諒老公，她點頭說：「發生呢啲事，正常人都會嬲，但依家念在我哋有小朋友，同埋咁多年感情⋯希望佢公司都睇到佢咁多年付出，畀多次機會佢。」問到朱智賢於記者會上未有向她道歉，被網民插爆，黎太表示：「道唔道歉都唔緊要，我都擔心佢情況，希望佢快啲冇事啦！」

「我可以抽離角色」
黎振燁被問到事後有否與朱智賢聯絡，他表示沒有，亦因照顧太太，沒有收看朱智賢和謝東閔的記者會，他更口快快自爆這段霧水緣只維持了數星期：「講到尾都係我唔啱，唔應該畀藉口自己，依家最緊要希望佢（太太）心情及身體狀況好番。嚟緊相信我都會有段幾長嘅時間休息！」因為跟朱智賢拍劇集《食腦喪B》撻着，問是之後是否可抽離角色？他說：「相信我可以抽離，做番幾個禮拜之前真正嘅我。（即係同朱智賢只開始咗幾星期？）唔係好長囉。」

一人做事一人當
問是否已完全獲得太太原諒，並承諾不會「重覆犯錯」，他說：「老實講，發生呢啲事係咪一時三刻、或者三兩日就可以可以完全冇事呢？咁我哋又唔可以輕易當冇發生過，畀啲時間太太，希望佢可以完全消化到件事，之後釋懷原諒我。（以後一定唔再發生呢啲事？）我覺得唔係口頭上承諾就得，要行動嚟畀太太睇。有啲事情人生中發生一次就夠，呢啲事一次都嫌多。」他又表示希望一人做事一人當：「禍不及妻子，大家唔好騷擾太太，畀佢喘息空間準備生產，唔該晒！（BB仔定女？）仔嚟。」

做心理準備消失幕前
談到會否擔心無綫長期雪藏、甚至放棄他，他不諱言：「我都覺得自己未必有機會再喺幕前演出，但小朋友就嚟出世，唔可以冇嘢做，就算體力勞動工作我都要做，要搵奶粉錢。如果公司放棄我，我都唔可以放棄我自己。」

iamsunny

鬧爆黎振燁大話精　謝東閔：為挽救孕婦嘅心！

藝人黎振燁拖大肚夫妻蒲頭，坦言與朱智賢的霧水情緣只是幾星期，又表示相信自己之後會抽離這段感情。即時觸動了謝東閔的神經，漏夜在社交網反擊鬧爆黎振燁。

對此，東網都分別聯絡了二人，謝東閔受訪時被問到黎振燁說了甚麼大話時，他坦言:「其實尋晚我係有感而發，但如果一個人再企出嚟都係話大話，如果呢啲大話，可以挽救到一個孕婦嘅心同一個家庭，我會啃咗佢，至於佢再出嚟講嗰啲係咩大話，佢自己知！」謝東閔再三強調自己相信女友朱智賢，表示會跟她齊齊捱過這段日子。而黎振燁被問到「大話」一事時表示沒有回應。

iamsunny

朱智賢返娘家沉澱　謝東閔孤獨新居入伙

藝人謝東閔慘被女友朱智賢背叛，女方偷食人夫黎振燁，事後謝東閔同朱智賢出嚟見記者，承諾會共度難關。
謝東閔被影到已經搬離同朱智賢喺深井嘅愛巢，佢喺舊居深井豎御海峰執拾行李，之後就開車去原本諗住同朱智賢同居、位於屯門嘅私人屋苑海譽。據知，謝東閔計劃同朱智賢結婚，為咗方便朱智賢返娘家，先會選址屯門築愛巢，但偷食事件後，朱智賢搬返娘家沉澱，謝東閔就孤伶伶搬入新居。

iamsunny

潛水兩周！偷食人夫朱智賢首度更新社交網

無綫藝人朱智賢（Ashley）上月尾爆出背男友謝東閔偷食人夫黎振燁，事後佢孖住謝東閔現身開記者道歉，自此一度神隱，更曾將社交網用戶設為「私人」，雖然早前已重新設定為「公開」，但依然久未更新。直至今日，「消失」近兩周嘅佢終於「蒲頭」，佢喺社交網轉貼一則發文，文中提到：「Stop trying to calm the storm. Calm yourself. The storm will pass.（不要強行制止風波困難，讓自己冷靜面對，才能安然度過風浪。）」相信正經歷難關嘅佢以此金句自勉。

iamsunny

兌現承諾？謝東閔朱智賢做運動操Fit
05月23日(六)15:40更新

藝人朱智賢早前被爆偷食人夫黎振燁，事後朱智賢同男友謝東閔開記者會道歉，謝東閔除咗力撐朱智賢之外，仲表示會抽多啲時間陪伴對方。

即將要拍攝劇集《七公主》同《刑偵日記》嘅謝東閔，喺社交網話做Keep住做運動保持最佳狀態，而朱智賢亦都去咗做運動，雖然只係見到佢嘅側面，但睇嚟佢心情已經平復唔少啦！網友指佢哋喺差唔多嘅時間上載做運動相，似乎係一齊做運動啵！

ching2506

(on.cc)
做番好老公！老婆剖腹誕子　黎振燁全程陪產
06月03日(三) 11:04

藝人黎振燁早前被爆搭上新劇拍檔朱智賢背大肚妻偷食，被揭到山旯旮食蛋糕，兩人形象插水，但黎振燁知錯獲老婆原諒，早前黎太產前檢查時，驗出BB臍帶纏頸，以致黎振燁和黎太都十分擔心，據知擇定日子剖腹生子，黎太今日在私家醫院順利誕下兒子，母子平安！而黎振燁都一直守候在身邊。